Non é doado cambiar un modelo urbanístico, cheo de irregularidades, e con varias persoas afeitas a facer o que querían na vila, pero a chegada do BNG ao goberno sadense supuxo unha ruptura co pasado. O novo goberno apostou por un urbanismo de calidade e totalmente respectuoso coa legalidade. Non se pode facer responsable a este goberno do feito e aprobado polos anteriores de tantos anos. En Sada sempre gobernaron os mesmos ata que o BNG chegou á Alcaldía con Abel López Soto, en coalición con outras organizacións.
Agora presentan unha denuncia contra o Alcalde Abel López Soto e a concelleira de urbanismo María Xosé Carnota, do BNG, por unha licenza outorgada polo anterior goberno. Isto xa é rizar o rizo. Unha denuncia pouco crible politicamente xa que en Sada a cidadanía ben sabe quen é cada quen, e ben sabe quen defende a legalidade urbanística e quen defende intereses privados. Tanto o Alcalde como a concelleira de urbanismo queren aclarar este proceso canto antes, e seguirán traballando por fortalecer e potenciar a vila de Sada cun urbanismo respectuoso coas normas e un estilo de goberno digno, ético e responsable socialmente.
O goberno municipal fixo pública a seguinte nota de prensa:
En relación coa denuncia penal interposta por D. Gervasio Carballo Brasa contra, entre outros, do alcalde e a concelleira de urbanismo, este goberno municipal informa do seguinte :
1.- A denuncia fundamentase en catro cuestións : a nulidade da licenza de obras, a non paralización das mesmas, a non caducidade de dita licenza e a denegación ao denunciante de acceso á documentación dos referidos expedentes.
En relación coa licenza de obras 653/2005 :
a) Dita licenza de obras 653/2005 foi outorgada por acordo da Xunta de Goberno Local de 21/10/2005, co voto favorable de Ramón Rodríguez Ares, José E. Gómez López, Mar Fernández Linares e Juan Barbeito Miño (falecido), nengún dos cales foi denunciado polo Sr. Carballo Brasa. Ou dito doutro xeito, o Sr. Carballo Brasa considera delictivo o outorgamento de dita licenza pero non denuncia ás persoas que a concederon e, sen embargo, denuncia ao actual alcalde e á actual concelleira de urbanismo cando nen un nen a outra teñen nada que ver coa concesión de dita licenza.
b) A licenza 653/2005 foi obxecto dunha solicitude de revisión de oficio formulado por un concelleiro do BNG o día 08/04/2006. Dita solicitude foi desestimada expresamente por Decreto 96/2007 de data 24/01/2007 do alcade de Sada naquel entón, o Sr. Rodríguez Ares. Ou dito doutro xeito, o Sr. Carballo Brasa denuncia penalmente ao actual alcade e á concelleira de urbanismo por non revisar de oficio dita licenza, cando dita revisión de oficio xa foi rexeitada expresamente no 2007 polo Sr. Rodríguez Ares, quen, sen embargo, non foi denunciado penalmente polo Sr. Carballo Brasa.
O Sr. Carballo Brasa non adxuntou á súa denuncia documentación relativa aos feitos anteriores, a pesar de que lle constan expresamente.
c) Tamén alega o Sr. Carballo Brasa que os denunciados non atenderon un requerimento de información que en relación con dita licenza formulou a Consellería de Política Territorial en xaneiro de 2007. O sorprendente é que naquel momento (xaneiro do 2007) o alcalde de Sada era o Sr. Rodríguez Ares, non denunciado polo Sr. Carballo Brasa. Ou sexa, o alcalde, Sr. Rodriguez Ares, era o que estaba obrigado a atender dito requerimento de información no prazo máximo de 20 días hábiles, e non o fixo, como era a súa práctica habitual, pero non foi denunciado polo Sr. Carballo Brasa e si o foi o actual alcalde, que tomou posesión varios meses máis tarde.
En relación coa non paralización das obras :
O Sr. Carballo Brasa presentou reiteradas denuncias en relación co pretendido desaxuste das obras á licenza outorgada. A concellalía de urbanismo ordenou aos servizos técnicos municipais a emisión dos informes ao respecto e que concluiron que as obras se asustaban substancialmente ao proxecto técnico obxecto de licenza e que, por tanto, non procedía a paralización das mesmas, entre eles o extenso e exhaustivo do arquitecto municipal, de data 22/10/2008. Evidentemente, dito informe non foi adxuntado polo Sr. Carballo na súa denuncia, a pesar de que lle consta expresamente.
En relación coa non declaración de caducidade da licenza de obras :
Mediante acordo da Xunta de Goberno Local de 17/12/2009 resolveuse a non declaración de caducidade da dita licenza de obras. Sendo certo que por parte dun funcionario do Concello se emitíu un informe favorable a dita caducidade, tanto por parte do Letrado do Servizo de Asistencia a Municipios da Deputación como por parte do Secretario de Concello e do Letrado asesor xurídico do Concello, nos seus informes conclúese claramente a non procedencia da declaración de caducidade de dita licenza, que é o que se acordou.
O sr. Gervasio Carballo adxuntou á súa denuncia o informe do funcionario (favorable á caducidade) pero non adxuntou os tres informes xurídicos anteriores (contrarios á caducidade, entre eles o do Secretario da Corporación), a pesar de que lle constan expresamente.
En relación coa denegación de acceso á documentación :
O Sr, Carballo Brasa tivo acceso en reiteradas ocasións aos expedentes administrativos relacionados coa súa denuncia. O goberno municipal nunca lle denegou dito acceso. Sorprende enormemente que se denuncie a denegación de acceso á documentación cando o Sr. Carballo Brasa é parte en varios recursos contenciosos-administrativos que teñen por obxecto ditas edificacións e que, por tanto, tivo acceso á totalidade dos expedentes.
2.- O goberno municipal louba o repentino interés do Sr. Carballo Brasa na defensa da legalidade urbanística sadense, pero resulta sorprendente que denuncie un suposto trato de favor ao promotor cando él mesmo, o Sr,. Carballo Brasa, tense persoado en apoio do Concello no recurso contencioso que interposto pola promotora ten por obxecto a denegación municipal da licenza de primeira ocupación de dito inmoble. Máis sorprendente é que denuncie penalmente a membros do actual goberno, que nada teñen que ver co outorgamento dunha licenza que o Sr. Carballo considera ilícito penal, e non denuncie aos responsables do seu outorgamento no 2005, nun goberno no que alcalde era o Sr. Rodríguez Ares e do cal formaban parte actuais concelleiros da oposición.
3.- Tanto o alcalde como a concelleira de urbanismo están desexosos de prestar declaración e colaborar coa Administración de Xustiza, xa que non hai motivo nengún que fundamente ou ampare a querela interposta polo Sr. Carballo Brasa, como estamos seguros que así será estimado polo Xuzgado de Betanzos. Tamén quedarán claros os motivos reais e concretos da presentación da querela polo Sr. Carballo Brasa e dos intereses que defende, que non son, desde logo, a defensa da legalidade urbanística sadense.
A cidadanía de Sada coñece perfectamente ao denunciante, aos denunciados e tamén aos responsables políticos que, sen ser denunciados polo Sr. Carballo Brasa, son os responsables directos da licenza de obras. E ben sabe a cidadania sadense onde está a defensa da legalidade urbanística e onde a defensa de intereses privados, que nada teñen que ver con ela.
